LA UNION – Agtultuloy iti imbestigasyon ti pulisya maipapan ti pannakatay ti maysa a motorcycle rider kalpasan a namindua a daras a nadungpar daytoy iti dua a lugan iti kawatiwatan ti national highway idiay Barangay Cabaroan, ili ti Bacnotan, La Union.
Nabigbig ti biktima a ni John Lester Raguidin, 22, residente iti ili ti Balaoan iti probinsya.
Naammuan ti Bombo Radyo manipud iti Bacnotan Police Station, maipagarup nga immagaw ti linya ti biktima nga agpatpataray iti motorsiklona iti kasinnabat a wagon a manmanehuen ni Vincent Querido, 54, residente ti Florida Blanca, Pampanga.
Gapu iti kinapigsa ti panagdinnungpar, naipullasit ti motorcycle rider ken nadungpar manen ti bagina babaen ti maysa a truck.
Dagus met a naiturong idiay Bacnotan District Hospital ti biktima ngem naideklara daytoy a dead on arrival babaen ti doktor a nangtaming kenkuana.
Adda met ita idiay estasyon ti pulisya ni Querido ken maipaspasidong iti imbestigasyon.
Dukduktalen met dagiti otoridad ti pakabigbigan ti driver ti nasao a truck a naglibas kalpasan ti aksidente.
