LA UNION – Natay ti maysa a driver ti motorsiklo kalpasan a naidungparda iti truck iti crossing ti Consolacion St. ken national highway idiay Brgy.Poblacion, Bacnotan, La Union.
Ti pimmusay ket nabigbig a ni Christian Almoite, 24-anyos, residente ti Brgy. Cabarsican.
Maibasar iti imbestigasion ti pulisia, dumaldalyasat iti national highway ti wing van a minaneho ni Crisanto Vitug, 39, taga-San Juan, Lubao, Pampanga idi kellaat a simmungad manipud iti daya a kalsada ti motorsiklo.
Gapu iti daytoy, naipurwak da Almoite ken ti backride-na a ni Erwin Licayan, 18-anyos.
Dagusda met a naitaray iti pagagasan ngem naideklara a natay ni Almoite kabayatan a matamtaming.
Iti agdama ket tengngel metten dagiti otoridad ni Vitug para iti naan-anay nga imbestigasion.
