LA UNION – Imbilinen ni Brigadier General Joel Orduña, Director ti Police Regional Office-1 (PRO-1) iti Internal Service Affairs (IAS) ti panangisayangkat ti motu proprio investigation kontra kadagiti dua a pulis a suspek iti panangtambang kadagiti agama a Vice-mayor Al-fred Concepcion ken Mayor Aleli Concpecion ti Balaoan, La Union.
Iti npannakiuman ti Bombo Radyo kenni PRO-1 spokesperson Lt. Col. Mary Crystal Peralta, kinunana a nangiruar metten iti order ni Brigadier General Orduña para kadagiti nasao a pulis nga isuda Police Master Sergeant Dario Cahigas ken Police Senior Master Sergeant Arnold Calzado tapno agtalinaed dagitoy iti Personnel Holding and Accounting Unit kabayatan nga im-imbestigaran ti IAS ti sangsanguenda a kaso nga administratibo nga epektibo ita nga aldaw.
Saan metten a nangipaay ti komento ti opisyal maipapan ti kaso a criminal nga indatag ti National Bureau of Investigation (NBI) kontra kadagiti dua a pulis.
Immuna iti daytoy, rinugyanen ti Department of Justice (DoJ) ti preliminary investigation iti napasamak a panang-ambush iti agama idi November 14, 2018.
Double murder ken multiple counts of frustrated murder ti indatag a kaso ti NBI kontra kadagiti dua a pulis ken iti dua pay a John Does a suspek iti krimen.
Iti nadakamat a panangtambang, natay ni Vice-mayor Al-fred ken ti maysa a body guard-da, kabayatan a nakalasat met ni Mayor Aleli ken ti dadduma pay a kakadduada ti convoy.
