Inikkat ti Maharlika Pilipinas Basketball League (MPBL) iti Bacolod Masskara iti nabatbati a paset ti 2026 season kalpasan iti mapapati a game manipulation iti laban daytoy kontra Bulacan Kuyas. Segun ti liga, nabayagdan a banbantayan iti koponan ken siguden a naikkan ti pakdaar mainaig dagiti immuna nga insidente a naireport iti opisina ti commissioner.
Nagbalin a sentro ti imbestigasion iti ay-ayam no sadino inabak ti Bulacan iti Bacolod, iti iskor nga 100-64. Iti maudi a 7 a minuto ken 48 a segundo ti fourth quarter, saan a nakapuntos iti Bacolod ken nakaaramid pay ti innem a turnovers, banag a nangpataud ti nainget a panagamiris ti liga.
Segun kenni MPBL Commissioner Emmer Oreta, nainget a salsalimetmetan ti liga iti integridad ti Philippine basketball ken dagos daytoy nga agtignay kontra iti aniaman nga aktibidad a mangdadael iti panagtalek dagiti fans, dagiti koponan, ken publiko.
Inaprobaran met ni MPBL Founder ken CEO Manny Pacquiao iti naipataw a dusa kalpasan a mabuya na iti nasao nga ay-ayam. Immuma metten a nagballaag ni Pacquiao a nainget nga ipatungpal ti MPBL iti kampanya kontra iti game-fixing tapno mapagtalinaed iti kredibilidad ti liga.
Kabayatanna, nangisayangkaten ti fact-finding investigation iti Games and Amusements Board (GAB). Maalaan ti statement dagiti players ken dadduma pay a karaman tapno masigurado ti due process sakbay a mangiruar ti pinal a desision maitunos iti agdama a pagannurutan.###
