BR LA UNION – Immuna a nagprisinta ti depensa iti maika-tallo nga aldaw ti confirmation of charges hearing kontra kenni sigud a President Rodrigo Duterte idiay International Criminal Court (ICC) ita nga aldaw ti Huwebes, Pebrero 26, 2026.
Sakbay a nangrugi ti presentasyon ti depensa, inlawlawag ni Atty. Nicolas Kaufman, lead counsel ti sigud a Presidente, nga awan ti ilup-lupit da a siasinuman a natay nga indibidwal ken saan a nakadirekta ti kritisismo da iti kakabagyan dagiti biktima nga adda iti gallery ti ICC, ngem ketdi nakasentro laeng daytoy iti Documents Containing Charges ti prosekusyon.
Impaganetget pay ni Kaufman a saan a papel ti depensa a mangipaay ti alternatibo a naratibo wenno palawag iti facts ken figures nga imprisenta ti prosekusyon.
Inlawlawag ni Kaufman a ti papel ti depensa ket allokoyen dagiti ICC judges a saan a nasken nga agtalinaed a nakabalud ti sigud a presidente agingga iti sumaganad a tawen, agsipudta awan ti substantial grounds a maipakita ti prosekusyon nga inaramid ti sigud a presidente dagiti maiyak-akusar kenkuana a krimen.
