Saan a pabor ti Movie and Television Review and Classification Board (MTRCB) iti singasing nga iparit dagiti pelikula ken programa nga addaan ti naranggas a tema kas addang tapno maksayan dagiti krimen a pakairamramanan dagiti menor de edad.
Immunan nga insingasing ni Philippine National Police (PNP) Chief Gen. Jose Melencio Nartatez Jr. iti nasao nga addang kasaruno ti nagsasaruno nga insidente ti kinaranggas kadagiti pagadalan.
Segun kenkuana, maysa daytoy kadagiti mabalin nga adalen tapno masungbatan iti kumarkaro a kaso ti kinaranggas a pakairamramanan dagiti agtutubo.
Nupay kasta, iti maysa a waragawag, kenuna ti MTRCB a nupay bigbigen daytoy iti panagamak ti publiko iti posible nga epekto dagiti nararanggas a pabuya kadagiti agtutubo, saan nga iti panangiparit kadakuada iti umno a solusion.
Inpaganetget ti ahensia nga iti panangtaripato kadagiti ubbing kontra kadagiti makadadael a linaon dagiti pabuya ket responsibilidad saan laeng a ti gobierno no di ket pati pay dagiti nagannak, mannursuro, media practitioners, digital content creators, ken dagiti stakeholders iti industriya ti pelikula ken telebision.
Aktibo da a makitintinnulong kadagiti adda iti industriya tapno masigurado a maipakpakita kadagiti pelikula programa iti telibision, ken dadduma pay a materyales dagiti adal a mangisursuro ti panagbalin a maysa a Pilipino, kagiddan ti panangitandudo ti responsable ken boluntaryo a regulasion iti panagaramid ti pabuya.
Impaganetget pay ti MTRCB nga iti panangiparit kadagiti pelikula ken programa nga adda ti naranggas a tema ket mabalin a manglabsing iti karbengan dagiti Filipino creators iti nawaya a panagipablaak.
