BANGAR, LA UNION – Natay ti maysa a Sangguniang Bayan Member iti ili ti Sudipen ken ti angkas daytoy kalpasan a maaksidente ti naglugananda a motorsiklo idiay national highway a masakupan ti Barangay San Blas, Bangar, La Union, alas 11:15 idi rabii, Abril 18.
Nabigbig dagiti biktima nga isuda Sangguniang Bayan Member Edwin Belisoa Jr., 25-anyos, nagmaneho ti motorsiklo; ken ti angkas daytoy a ni Ronald Lipurada, 26-anyos, laborer, agpada a residente iti Barangay Ilocano, Sudipen, La Union.
Base iti insayangkat nga imbestigasyon iti Bangar Police, daldalyasaten iti motorsiklo a minaneho ni Belisoa ti amianan a direksyon iti kalsada idi maipagarup a napukawan daytoy ti kontrol ti manibela kasaruno iti panagdiretso iti akinkannigid a paset iti kalsada inggana a naidungpar iti steel post signage.
Gapu iti kinapigsa ti impact ti insidente, naipurwak dagiti dua iti kalsada.
Agpada a nagsagaba iti pannakadundunor dagiti biktima kasaruno ti pannakaitaray dagitoy iti Balaoan District Hospital para iti pannakatamingda ngem naideklara a dead on arrival ni Lipurada, bayat a natay met laeng a natay ni Belisoa kabayatan a matamtaming daytoy iti pagagasan.
Naamwan manipud iti imbestigador a paawiden dagiti biktima a naggapu iti lamay idi napasamak ti aksidente.
