LA UNION – Nu adda man iti kangrunaan a kiddaw ti muslim community iti intero a probinsiya ti La Union iti nasyunal a gobyerno, daytoy ket iti maipaayan da ti lugar para iti muslim cemetery wenno aw-awagan da ti Maqbara.
Iti pannaki-uman ti Bombo Radyo kenni Shaykh Zainal Macapundag, Presidente ti La Union Muslim Association (LUMA), nagpanawagan iti gobyerno a maikkan da ti muslim cemetery a pakaiturongan ti minatay dagitoy.
Kinuna ni Macapundag nga awan pay ti permanente a sementeryo da a muslim ditoy La Union, isunga narigat para kadakuada a nu adda pumusay a kabsat da a muslim ket iturong da pay idiay Alaminos City, Pangasinan a pakasarakan ti kakaisuna a muslim cemetery iti intero a rehiyon uno.
Segun pay kenni Shaykh Macapundag, adda iti nasurok sangaribu a muslim nga agnanaed ditoy siyudad ti San Fernando ken nasurok 5,000 iti intero a probinsiya ti La Union.
