LA UNION – Sumangsango itan ti kaso a panagtakaw ti 41-anyos a babai a maipagarup a nagtakaw iti uneg ti maysa a grocery store idiay Barangay Pagdaraoan, syudad ti San Fernando, La Union.
Sigun kenni Cpl. Jefferson Sagun ti San Fernando City Police, nakitaan ti piskalya iti probable cause ti nasao a suspek a taga-Malabon City isu a manamnama a mai-turn over iti San Fernando City Jail kabayatan a maur-uray ti panakausig iti kaso daytoy.
Maipalagip a naaresto ti nadakamat a babai kalpasan a matiliwan babaen ti CCTV camera ti gorseryaan nga agisuksukibot kadagiti tagilako nga agbalor iti nasurok P7,000 ngem maipagarup a nakalibas dagiti dadduma pay kakadduana.
Madama met iti imbestigasyon ti pulisya no adda iti pakainaigan ti suspek iti sabali pay a napasamak a shop lifting a napasamak idiay ili ti Rosario, La Union idi napalabas a lawas.
