LA UNION – Nakabaluden ita idiay kwerpo ti pulisya ti pulis nga awan sarday a nangpaltog ken nagpapatay iti nakaririna a baro idiay Barangay Tabora East, ili ti Pugo, La Union.
Nabigbig ti suspek a ni PO1 Francis Micheal Laranang, 35, nakadistino iti General Services Section ti La Union Police Provincial Office, ken residente ti nasao a lugar.
Base ti imbestigasyon ti Pugo Police Station, maipagarup a nakarikyar ti pulis ti 33-anyos a biktima a ni Samson Eloja, residente ti Barangay Ambalite ti nasao nga ili, a nangiparada laeng iti luganna idiay igid ti kalsada iti sango ti balay ti nadakamat a suspek.
Maipagarup a limmiklik ni Eloja kenni Laranang isu nga inyakarna ti luganna iti basketball court.
Sinaruno ti suspek ti biktima kasaruno iti pammapatay babaen ti panagaramatna ti cal .9mm a paltog.
Naiturong iti La Union Medical Center idiay ili ti Agoo, La Union ti baro ngem pimmusay met laeng daytoy gapu iti kinaadu dagiti tama iti bala ti paltog iti naduma-duma a paset ti bagina.
Dagus met a naaresto idiay balayna ti suspek kalpasan a simmuko daytoy kadagiti padana a pulis a nagresponde iti insidente ken maisagsaganan ti kaso kontra kenkuana.
