LA UNION – Pasadya a naimula ken matar-taripato a nasayaat iti nadiskubre a marijuana plants dagiti otoridad iti nagbeddengan ti Sitio Sawangan, Sugpon, Ilocos Sur ken Sitio Culiang, Tacadang, Kibungan, Benguet.
Daytoy ti kinumpirma bayat iti eksklusibo a pannakiuman ti Bombo Radyo kenni PLT Jerry Arzabal, agdama a chief-of-police idiay Sugpon, Ilocos Sur.
Kinuna ni Arzabal nga idi madanon da ti lugar a nakaimulaan dagiti marijuana ket nadlawan da a nadalusan wenno naikkat iti ruot na, madan-danuman/masib-sobagan ken pattien dagiti otoridad a kaab-abuno pay dagiti nasao nga iligal a droga.
Inlawlawag pay ni Arzabal a dua nga aldaw nga impatungpal da ti operasyon a “Marijuana Eradication” gaputi maipagarop a kina-delikado iti pagnaan nga agturong iti plantasyon.
Kinuna ni Arzabal nga umabot iti 17,550 fully grown marijuana plants iti pinarut da malaksid pay iti 7 kilos ti MJ dried stalks manipud iti siyam a disso iti kalawa a 3,650 Sqms. a daga ken addaan ti DDB value a Php 4,465,000.
Segun pay kenni PLT Arzabal a kalpasan ti inaramid dagitoy a documentation ken panangala ti umiso nga ebidensiya a naiturong iti PDEA-Regional Office One, ket inuram da dagiti pinagut da a marijuana ken mapag-pagango nga ungkay ti marijuana iti mismo a site.
Masansan nga agusar dagiti otoridad iti pananguram dagiti marijuana plants, iti kayo ti saleng a nabukbukan iti naglaok a krudo ken gasolina.
Aminado ti hepe ti pulisiya, a malaksid nga adda iti informant a mangidandanon kadakuada ti maipapan iti marijuana plantation, awan met ti makaitured a mangitudo nu siasino dagiti makunkuna a cultivators.
