LA UNION – Saan a nalapdan iti misis ti bagi ken emosyonna a nag-istoya iti Bombo Radyo no kasano a nadukot iti uppat nga armado a lallaki ti anakna nga makukuna a maipagarup a lider iti gun for hire group nga ag-o-operate kadagiti probinsya ti Ilocos Region.
Sigun kenni Teresita Ison, ina ti nadukot ken napapatay a maipagarup a lider iti Ramos gun for hire group a ni Rommel Ison, a saan laeng nga isuna ti nakaimatang iti panangdukot ti anak idiay pagtagilakuanda idiay palengke iti ili ti Bangar, La Union idi malem ti Agosto 6.
Bin-ig a nakabunete, naka-jacket iti agmaris nangisit ken maipagarup a nagpabigbig pay a kameng iti National Bureau of Investigation (NBI) dagiti immukot kenni Rommel.
Naaramidna pay iti makisinnungbat kadagiti abductors ken nagsaludsod no lihetimoda a taga-NBI nga addaan ti warrant of arrest tapno pusasan ti anakna.
Awan iti naaramidanda gapu iti buteng kasaruno iti pannangitaray dagiti armado a lallaki ni Rommel a nailugan iti maysa a van nga awanan ti plete number.
Dagus met a nagpaarayat ti misis kadagiti pulis, ngem nakaadayon dagiti abductors.
Kalpasan iti sumagmamano nga oras, iti karabiyanna ti nasao a petsa ket nadamagda laengen a nasarakan a maysan a bangkay ni Romel idiay Barangay Nalvo Sur ili ti Luna, La Union a nakapungngo dagiti saka ken nabalkot iti tape ti ulona.
Saan met a mamati ni Teresita a kameng iti gun for hire group wenno agar-aramid iti krimen ti anakna gapu ta kanayonda daytoy a kaddua nga aglaklako idiay palengke.
Mangnamnama met daytoy ken iti pamiliyana a maipaayan ti hustisya iti pannakatay ti anak.
Immuna iti daytoy, kinuna ni S/Supt. Ricardo Layug Jr., a ni Rommel Ison iti maipagarup a simmukat a lider ti Ramos gun for hire group kalpasan a matay ti sigud a mangidadaulo kadakuada a ni Rizaldo Ramos.
Malaksid iti droga ken panagbalin a gun for hire ket maipagarup a karaman pay ti grupo iti serye ti pangholdap iti umuna a distrito ti La Union ken dumanonda pay idiay Ilocos Sur agingga idiay Ilocos Norte.
Maipagarup nga innagaw iti babae ken isyu iti bingay ti kwarta ti makitkita a makagapu ti pulisya no apay a nagsisina iti Ramos group a nagbanag iti panagpipinnatay dagiti miyembro. (Absalom Flores)
