LA UNION – Natiliwen dagiti otoridad idiay Middle Quirino Hill, Baguio City iti naglibas a balud ken maibilang a No. 4 Top Drug Watchlist idiay Agoo, La Union.
Babaen iti nagtipon a puwersa ti Agoo Police Station, CIDG Baguio, BCPO Station 2, PDEA Baguio, ken dadduma pay nga enforcement unit, nagballigi iti operasyon da a nangkemmeg iti subject person, managan Teofilo Lopez y Doctolero, 25-anyos, residente ti Brgy. San Isidro, Agoo, La Union.
Naisayangkat ti operasyon agarop alas 7:40 idi rabii, November 17, 2020.
Naarestar iti suspek, maiyannurot iti warrant of arrest, napetsaan ti Nov. 16, 2020 nga impaulog ni Hon. Romeo M. Atillo Jr. Presiding Judge, First Judicial Region, RTC Branch 31, Agoo, La Union gaputi kaso a panaglabsing iti Sec. 5, Art II ti RA No. 9165.
Immunan a naipadamag ditoy Bombo Radyo a ginundawayan ti nasao a balud iti naglibas idi mapan agdaram-us iti police escort daytoy a maipagarop nga inuyekan na, bayat a nakalugan dagitoy ti patrol car, tapno iturong koma iti ospital nga agpa-check up gaputi atap a naakaran iti COVID 19.
