LA UNION – Nangiyatnag iti pammilin ni Mayor Nieri Flores a maiturong kadagiti amin a municipal ken barangay officials idiay ili ti Naguilian, La Union maipapan ti panagbalin a responsable a panag-post iti ladawan ti social media.
Base iti Memorandum No. 2021-09 nga impaulog ti alkalde, impaganetgetna a kas public servant a mangipatpatungpal kadagiti paggannurutan ket nasken nga agbalinda a pagwadan kadagiti umili.
Makaaw-awat ngamin iti report ti opisina ti mayor maipapan iti panangipablaak kadagiti ladawan babaen ti social media iti sumagmamano a municipal ken barangay officials karaman dagiti empleyado nga adda ti nalawag a panaglabsing iti minimum public health standards a maikaniwas iti maipatpatungpal nga ordinansa ti lokal a gobyerno iti nasao nga ili.
Impaganetget pay ni Mayor Flores kadagiti government officials nga adda iti masakupanna a lugar a saan nga ag-post kadagiti ladawan a mangiparparangarang iti panaglabsing ti health protocols.
Iti umuna a panaglabsing wenno first offense ket mamulta iti P1,000; ken agbayad met iti P2,000 para ti maikaddua a panaglabsing.
P2,500 a multa wenno pannakaibalud iti innem a bulan, wenno agpada kadagitoy a penalty no maikeddeng ti pangukuman ken pannakaikkat manipud iti serbisyo para succeeding offenses.
Impalagip pay ti alkalde a saan pay a nalpas iti labanda kontra ti COVID-19 pandemic isu a saan a nasken a masayang amin a panangikagumaan ken sakripisyo ti kaadduan tapno maparmek daytoy.
