Naksayan iti pressure iti Bangko Sentral ng Pilipinas (BSP) a mangingato manen ti interest rate ita a bulan kalpasan a rimmang-ay laeng ti 2.3% iti ekonomiya iti maikadua a quarter ti 2026.
Segun kenni BSP Governor Eli Remolona Jr., nakapsot iti Gross Domestic Product (GDP) growth ken agtaltalinaed a negatibo iti output gap, indikasion a nababbaba iti potensial daytoy iti taray ti ekonomiya.
Nupay kasta, kenunana nga amin nga opsion ket agtaltalinaed a silulukat sakbay iti Monetary Board meeting inton Agosto 27.
Ti 2.3% Quarter 2 growth ket nababbaba ti 2.8% idi umuna a quarter ken nangiyeg iti first-half growth iti 2.6%.
Karaman kadagiti nakaapektar ditoy iti panagkapsut ti panagpuonan ken 14.8% contraction iti construction.
Iti laksid daytoy, agtaltalinaed a kangrunaan a mandato ti BSP iti panangpatalinaed ti price stability.
Immunan nga inngato ti central bank iti key policy rate iti 4.75% kalpasan iti dua a nagsaruno a 25-basis-point hikes idi Abril ken Hunyo.
Kenuna met ni BSP Deputy Governor Zeno Abenoja nga agtultuloy da a suksukimaten iti inflation, consumption, investment, exports, presyo ti langis, unemployment ken sweldo sakbay nga agdesision iti sumaruno a policy move.
Iti agdama, agtaltalinaed a karit iti BSP iti panagbirok ti balanse iti nagbaetan ti pananglapped iti inflation ken panagsuporta iti kumapkapsot a panagrang-ay ti ekonomiya.###
