LA UNION – Pinirmaan ti Don Mariano Marcos State University President a ni Dr. Jaime Manuel Jr. iti memorandum nga inaramid ti Faculty Association, University Non-Teaching, ken University student council seknan iti temporaryo a saan a panagisuot iti uniporme dagiti estudiyante ti Don Mariano Marcos Memorial State University Mid La Union Campus, North La Union Campus, ken South La Union Campus gapu iti kumarkaro a pudot ti paniempo.
Epektibo ti nasao a memorandum idi Lunes, Abril 8, 2024.
Iti pannakiuman ti Bombo Radyo La Union ken ni Jay Louise Carosa, Chairperson ti Campus Student Organization, nga adda dagiti estudiante a kayatda ti asynchronous class, ngem naruay dagiti banag a nasken a maikonsiderar sakbay a maipatungpal daytoy, isu ti gapuna a ti napanunot da a wagas ket ti temporaryo a pannkasuspenso ti panagisuot ti uniporme.
Kinunana a saan laeng a dagiti estudiante ti matulongan ti nasao a memorandum no di pay ket dagiti faculty staff, admin staff, ken teaching and non-teaching personnel.
Kabayatanna, positibo ti sungbat dagiti estudiyante iti wagas ti panagpampanunot dagiti organisasyon tapno mapalag-an ti mapaspasaran a pudot ti paniempo.
