LA UNION – Ad-adalen ita ti lokal a gobyerno ken City Health Office (CHO) ditoy syudad ti San Fernando, nu kasapolan nga ipatungpal iti nalawlawa pay a mass testing malaksid iti compound ti Police Regional Office One, a nagbalin a critical area kalpasan a dumanon iti nasurok 50 dagiti pulis a nagpositibo iti sakit a COVID-19.
Base iti impormasyon ti Bombo Radyo La Union, plano ti LGU-San Fernando kadwa da ti CHO, nga isayangkat ti mass testing agingga kadagiti asideg a babbalay iti aglawlaw ti PRO-1.
Daytoy ket maysa a pamay-an tapno malapdan iti panagwaras ti sakit.
Nabingay iti dua a grupo dagiti pulis a nakabase iti PRO-1.
Iti umuna a batch ket nalpasen a naipasidong iti RT-PCR test ken malpas metten ti pannakaipasidong dagitoy iti 14-day quarantine iti mismo a compound ti PRO-1 inton Sabado.
Kabayatanna, iti maikadwa a batch dagiti pulis ket nakatuding a ma-swab test inton Domingo.
Naamwan nga adda iti 14 a kabarbaro a kuwarto iti nasao a kampo, nga agserbi kas isolation facility dagiti pulis a COVID patients.
