TUBAO, LA UNION – Nasarakanen dagiti otoridad idiay ili ti Tubao, La Union ti bangkay ti 42-anyos a construction worker a nalmes idiay Masalip Dam ti Brgy. Magsaysay, Tubao, La Union kalpasan ti 3 nga aldaw a panagsapsapol dagitoy.
Nabigbig ti biktima a ni Rio Cabutotan ti Barangay Francia Sur ti nasao nga ili.
Immuna iti daytoy, alas-9:00 idi bigat ti May 7 idi nagturong ti biktima kadwa ti live-in partner daytoy ken dagiti kakabagyanda iti nadakamat a dam tapno agkalap iti lames kasaruno iti panaginom dagitoy iti arak.
Segun kadagiti otoridad, maipagarup nga adda ti impluwensiya iti arak ti biktima idi a timmapog tapno agkalap iti lames ngem napaay daytoy a timmakdang.
