Nangiruar ti ebidensya ni Senate President Pro Tempore Ping Lacson kontra iti maysa nga opisyal ti Department of Public Works and Highways a maipagarop a nangidiaya ti ‘early budget insertions’ para iti 2026 National Expenditure Program.
Iti naisayangkat a privilege speech ti manmanday-linteg, impakita na iti screenshot ti maysa a mensahe manipud kenni DPWH Undersecretary Ma. Catalina Cabral a naipatulog kenni Senate President Vicente Sotto III, sumagmamano nga aldaw kalpasan a mangabak iti senatorial elections idi Mayo.
Segun kenni Lacson, iti mensahe ket addaan panggep a dumawat dagiti proyekto a mabalin a mairaman iti National Expenditure Program, ngem pinagkedkedan a dagos ni Sotto.
Maibasar iti screenshot, dinamag ni Cabral no addaan ti priority projects ni Sotto para iti “vetting” tapno maliklikan iti redundancy, overlap, ken masigurado a kalinya ti national priorities ken local project menu.
Inruar na iti ebidensya kalpasan a naglibak ni Cabral iti baro a sekretaryo ti DPWH a ni Vince Dizon maipanggep iti papel wenno akem na iti isyu.
Kabayatanna, binanatan ni Senate Minority Leader Alan Peter Cayetano iti maipagarop nga “amnesia” iti panagdingeg ti Blue Ribbon Committee mainaig dagiti ghost projects, geotagging, ken overhead expenses.
Segun kenni Cayetano, nalawag a saan nga agtunos iti immuna a waragawag ni Cabral kabayatan ti Blue Ribbon Committee hearing idi Agosto 27 – nga awan ti ammona.
Innayon pay ti senador, rumrumuar iti mensahe a maad-addaanen ti insertion uray adda pay laeng iti proseso iti ahensia ti panagaramid ti NEP, ken saan laeng kadagiti bicameral meetings ti Kongreso.###
