Saan a palampasen ti Senior Citizen Party-list ti pannakaarestar ken pannakaibalud ti 81-anyos a ni Prudencio Calubid Jr. a napabasol kas miembro ti New Peoples Army (NPA) ken consultant ti National Democratic Front of the Philippines (NDFP).
Segun kenni Senior Citizen Party-list Rep. Rodolfo Ompong Ordanes, ad-adalenen dagiti abogado da nu anya ti legal a wagas tapno mapagsungbat dagiti immarestar ken nangipabalud kenni Prudencio, pakairamanan dagiti kameng ti Philippine National Police (PNP), dagiti prosecutors ken ti hukom ti regional trial court.
Dinakamat ni Ordanes dagiti findings da nga ipresentar da iti House Committee on Justice ken Committee on Public Order and Safety, kasta met ti Supreme Court.
Ti addang ti Senior Citizen Party-list ket kasaruno ti panangtagiawan-bileg ti Court of Appeals ti kaso ni Prudencio kalpasan a mapaneknekan a a kankanagan na laeng iti talaga a target dagiti otoridad.
Nagpakdaar pay ni Ordanes nga agtalnan dagiti agpangpanggep a mangipila iti korte ti nagbalin a desisyon ti Court of Appeals, gapo kunana ta napalaosen ti sinagaba ni Calubid a biktima laeng met ti mistaken identity.
Nakikoordinar payen ti Senior Citizen Party-list iti Department of Social Welfare and Development (DSWD) ken ti Office of Senior Citizens Affairs tapno maikkan iti maiyannatop a pinansyal a tulong ken pagbiagan ni Lolo Prudencio.
