LA UNION – Kinumpirma ti Philippine Drug Enforcement Agency (PDEA) Regional Office-1 nga adda iti sidong ita ti rehabilitation program ti gobyerno ti napapatay a punong barangay idiay ili ti Bauang, La Union.
Iti pannakiuman ti Bombo Radyo kenni PDEA Regional Office-1 Information Officer Bismarc Bengwayan, kinunana a nairaman iti narco-list ti nagan ni Kapitan Alejo Abuan ti Barangay Parian Este, Bauang idi kangitingitan ti Oplan Tokhang.
Adda iti kategorya kas maipagarup a drug user umano ti punong barangay nga ita ket maipaspasidong iti rehabilitation program.
Kabayatanna, kinuna ni C/Ins. Silverio Ordinado Jr., spokesperson ti La Union Police Provincial Office, saan pay a natukoy iti motibo ti pammapatay kenni Abuan uray no karaman daytoy iti narco-list ken ipapabus-oyda pay laeng ti imbestigasyon kadagiti tauhan ti Bauang Police Station.
Immuna iti daytoy, timanbangan iti riding in tandem suspects si Abuan kabayatan nga agmanmaneho daytoy iti motorsiklo nga agturong koma iti taripnog ti Liga ng mga Barangay iti nadakamat nga ili.
