Nangisayangkat ti naisina nga imbestigasion ti Commission on Human Rights (CHR) mainaing iti engkwentro idi Abril 19 idiay Barangay Salamanca, Toboso, Negros Occidental, a nakatayan ti saan a bumaba ti 19 a tattao.
Karaman kadagiti natay iti student-leader a ni Alyssa Alano ken community journalist a ni RJ Nichole Ledesma.
Segun ti CHR, nangipatulod daytoyen ti team idiay Negros Island Region tapno mangisayangkat ti independent investigation, kalpasan a nadlawan dagiti saan a panagtunos iti pakabigbigan dagiti natay.
Kabayatanna, tinakderan ti Armed Forces of the Philippines (AFP) a dagiti natay ket agpapada a miembro ti New People’s Army (NPA). Nupay kasta, pinaglibakan daytoy dagiti sumagmamano nga organisasion a mangibagbaga nga adda dagiti biktima—karaman da Alano ken Ledesma—iti sibilyan ken aktibo a makipaspaset kadagiti ganuat pangkomunidad.
Impaganetget ti CHR nga iti sidong ti International Humanitarian Law (IHL), napateg a nalawag a maitudo no sino dagiti combatant ken sino dagiti sibilyan, uray pay iti kangitingitan ti maysa a non-international armed conflict.###
