Agsagsaganan ti National Aeronautics and Space Administration (NASA) para iti panagpatingga ti mision ti Artemis II ita nga Abril 10, 2026 (oras ti Amerika), a sadiay manamnama ti natalged a panagdisso wenno splashdown ti spacecraft iti taaw iti asideg ti California.
Kalpasan ti nasurok a siam nga aldaw iti law-ang, ti Orion crew module—a nakaikabilan dagiti astronaut—ket agsina iti service module sakbay a sumrek iti atmosphere ti Earth. Bayat a mauram ti service module, sitatalged nga agsubli ti crew capsule iti planeta.
Apaman a makastrekda iti atmosphere, mapasaran dagiti astronaut ti nakaro a pudot ken puersa nga agingga iti mamimpat a daras ti normal a gravity. Temporario met a mapukaw ti komunikasion iti agarup innem a minuto gapu iti plasma a nangbalkot iti lugan.
Lumukat dagiti parachute tapno mapabannayat ti kapsula sakbay a naan-anay a mailumlom iti baybay. Agur-uray ti U.S. Navy para iti dagus a pannakaispal dagiti astronaut, a manamnama a maibiahe iti maysa a pasilidad ti medisina iti uneg ti dua nga oras kalpasan ti panagdisso.
Nasinged a bantayan ti NASA ti iseserrek manen ti lugan iti law-ang, nangruna kalpasan ti isyu ti heat shield iti napalabas a mission ti Artemis I. Gapu iti daytoy, nabaliwan ti pamay-an ti panagsubli tapno makissayan ti nakaro a pudot.
Nupay nairekord ti bassit a panagruar ti helium iti propulsion system, impasigurado dagiti opisial a saan nga apektaran dayta ti pakabuklan nga taray ti mission.
Segun iti NASA, ti naballigi a panagsubli ni Artemis II ket napateg nga addang para kadagiti masanguanan a mision iti bulan.
