Saanen nga baro para kenni Ferdinand Sibayan Tadije a tumulong iti padana a tao nangruna iti baybay.
Daytoy ket kalpasan na nga inalaw ti maysa a mangngalap a naisar-ong iti paset ti kabaybayan nga sakopen iti Barangay Paraoir, Balaoan, La Union.
Segun kenni Tadije madama isuna nga adda ti kallapaw na idi a makita na ti idi nga agparparaayat a ni Jon Jon Carlos Medriano, 23, residente ti Fishermen’s Village, Brgy. Poro, City of San Fernando, La Union.
Kinuna na a 15 a metro ti kaadayo na laeng manipud iti kallapaw idi a makita na ti mangngalap agarop alas 6 idi sardam kalman.
Malalasin kuna na kenni Medriano ti napalaos a panagkakapsot ken maul-ulaw ken adda kadagiti sugat iti saka na.
Isu a dagusda daytoy nga pinagdigos, pinakan ken inikkan iti bado na.
Innayon na pay a saanda nga ammo a uppat nga aldawen daytoy a mapukpukaw agingga a adda nakaibaga kenkuana ken dagus na met nga inyuman iti Coast Guard nga nakabase idiay Barangay Darigayos, Luna, La Union.
Iti sabali a bangir, saan laeng nga isuna ti inalawna iti baybay agsipudta idi adda pay laeng isuna idiay Saudi ket maysa daytoy kagagiti nangal-alaw kadagiti tattao sadiay.
Maipalagip, nagturong iti taaw ni Medriano idi July 25 ngem saanen daytoy nga nakasubli kalpasan a bimmaliktad ti bangka na ken nagpatapaw iti uppat nga aldaw idiay baybay.
