LA UNION – Namnamaen iti special investigation task group (SITG) a makaiteden iti salaysay ni Balaoan, La Union Mayor Aleli Concepcion ken dagiti body guards daytoy maipapan iti napasamak a panangtambang iti convoy dagitoy kalpasan a maipunpon ti bangkay ni Vice-mayor Al-fred Concepcion.
Iti pannakiuman ti Bombo Radyo kenni S/Supt. Ricardo Layug Jr., director ti La Union Police Provincial Office ken chairman ti SITG, kinunana a nakasaritan dagiti imbestigador ti body guards dagiti Concepcion ngem nagkedked dagitoy a pirmaan ti inaramidda nga affidavit.
Maipagarup nga urayen dagiti tauhan iti agama a Concepcion ti pammalubos manipud ti amoda tapno pirmaan ti sinapataan a salaylsay.
Sigun kenni Layug, napateg iti ibaga dagiti body guards ken ti alkalde para iti panagsukimat ti SITG tapno maammuan ti pudno a napasamak ken motibo iti panangtambang.
Iti sabali a bangir, kinuna pay iti opisyal nga iberipikada no sino iti makin-iggem wenno agtagikua iti maysa a calibre .45 baril, bala ken basyo daytoy a nasarakan dagiti imbestigador iti uneg ti van a nagluganan idi ti bise-alkalde.
Imbatad ni Layug a saan a lisensyado ti nadakamat nga igam.
Karaman met kinunana nga imbestiogaran ti SITG no otorisado dagiti body guards dagiti Concepcion nga agimet iti paltog.
Innayon pay ni Layug, ur-urayenda ti report iti Scene of Crime Operatives (SOCO) no adda iti sinnukatan ti putok iti baetan ti benneg dagiti Concepcion ken dagiti assassins.
Iti agdama kinunana ket maipaspasidong pay iti laboratory examinations ti amin a nakalapda ebidensya manipud iti crime scene.
