Pinasingkedan ti Land Transportation Franchising and Regulatory Board (LTFRB) nga ipaayandan ti special permit to operate dagiti 1,297 a pampasahero a bus iti pagilian para iti Semana Santa.
Manamnama ti panagdupodop dagiti pasahero nga agawid kadagiti probinsyada tapno agbakasyon ken rambakan ti Holy Week.
Segun kenni LTFRB chairperson Vigor Mendoza II, naipaayan ti special permits dagiti bus tapno masigurado nga adda ti umdas a units nga agpasada iti kangitingitan ti panagdupodop dagiti pasahero.
Malaksid ditoy, namnamaen ti ahensiya iti ad-ado a pasahero gapu ta mas pilyen ti kaaduan nga agbalin a praktikal ken saan pay nga usaren dagiti pribado a behikulo iti kangitingitan ti nangato a presyo ti langis.
Mainaig ditoy, binaon ti LTFRB chief dagiti amin a regional directors ti ahensia a siguraduen a sumursurot dagiti public utility terminals iti road worthiness ken inspection protocols.
Binilin na met dagiti bus operators ken drivers a siguraduen a natalged ken naurnos iti biyahe dagiti pasahero.
Kabayatanna, nangisayangkat iti ahensiya ti nainget nga inspeksion kadagiti PUV terminals tapno masungbatan dagiti reklamo kadagiti pasilidad a makakompromiso iti kinatalged dagiti pasahero.
Nagballaag met iti opisial kadagiti aglabsing a paayaban ken pagpalawagen no apay ta saan da a rumbeng a patawan ti dusa.###
