Umaboten iti 103 a lugar iti intero a pagilian ti naipasidong iti state of calamity gaputi epekto ti El Niño.
Segun kenni Presidential Communications Office (PCO) Assistant Secretary ken Task Force El Niño Spokesman Joey Villarama, a maibasar iti report ti Office of Civil Defense (OCD), dagiti nagdeklara ti state of calamity ket pakaibilangan dagiti siyudad, munisipalidad ken lima a probinsya kabilang iti Occidental Mindoro, Antique, Sultan Kudarat, Basilan ken Maguindanao del Sur.
Maibasar iti heat index forecast ti PAGASA, dumanon ti agingga 46°C iti kangatuan a heat index wenno bara a narikna ti bagi idiay Pili, Camarines Sur idi kalman.
Dimmanon met iti agingga 42-46°C heat index ti nailista iti 30 a lugar ditoy pagilian a pakairamanan ti Metro Manila nga immabot iti 43-44°C.
Segun iti PAGASA, simrek daytoy iti danger category ket posible a mangigubway ti heat cramps ken heat exhaustion iti nabayag nga exposure iti init ti maysa nga indibidwal.
Immunan nga imballaag ti PAGASA a lalo pay a kumaro iti marikrikna a kinabara ti panawen ditoy pagilian inton bulan ti Mayo a gapwanan ti summer season kagiddan ti El Niño Phenomenon .
