Saan a bumaba ti 111 a tatto iti pimmusay ken 87 dagiti nadangran kalpasan a dimmayeg ti magnitude 7.4 a ginggined iti akinlaud a paset ti Columbia ita nga aldaw, Agosto 11 (oras ditoy Pilipinas).
Indeklara ti gobierno ti state of emergency iti pagilian bayat nga agtultuloy dagiti search and rescue operations kadagiti lugar nga addaan ti nagreggaay a pasdek ken addaan dagiti mapapati a na-trap iti uneg dagiti debris.
Segun ti U.S. Geological Survey, timmama iti ginggined iti kauneg a nasurok-kumurang 107 a kilometro, bayat nga iti epicenter daytoy ket adda iti San José del Palmar idiay Chocó region, agarup 400 a kilometro laud ti Bogotá.
Impadamag ti Colombian government nga agarup 1,600 a pasdek iti nadadael, karaman iti saan a bumaba ti 61 a naan-anayen a narba. Karaman kadagiti kangrunaan a naapektaran ti Cali, Pereira, Quibdó, ken Manizales.
Kalawaan ti perdision iti Pereira ken Cali, no sadino agtultuloy iti panagbirok dagiti rescue workers ken sibilyan kadagiti nagreggaay a pasdek.
Idiay Pereira, saan a bumaba ti 15 a pasdek iti naipadamag a nagreggaay ken pagam-amkan nga adda dagiti tattao nga agtaltalinaed a na-trap iti uneg.
Idiay Cali, nangisayangkat ti panagkali dagiti bumbero, pulis, ken dagiti volunteers tapno maisalakan dagiti posible a nakalasat iti uneg dagiti debris.
Gapu iti kinalawa ti perdision, nasuspendir iti operasyon kadagiti sumagmamano nga airport iti laud a past ti pagilian, karaman dagiti eropuerto idiay Pereira, Manizales, Quibdó, Armenia, Cartago, ken Buenaventura bayat a maisaysayangkat iti structural inspections.
Kenuna met ni Colombian President Abelardo de la Espriella a kangrunaan a prayoridad ti gobierno iti panangispal kadagiti tao a na-trap iti uneg dagiti debris.
Innayon ti Colombian Geological Service, daytoy ti kapigsaan a ginggined a nailista iti pagilian iti maika-21 a siglo.
Saan a bumaba ti 21 aftershocks iti nailista kalpasan iti immuna a panagdayyeg.
Nairikna iti ginggined saan laeng nga iti nadumaduma a paset ti Colombia no di ket karaman pay iti kaasideg daytoy nga Ecuador ken Panama.
Nangidanon metten ti tulong dagiti sumagmamano a pagilian. Nangitukon iti Estados Unidos ti 15.5 million dollars para iti emergency shelter, taraon ken dadduma pay a pagkasapulan iti disaster response, bayat a nangipeksa met ti kinasagana a tumulong dagiti sumagmamano a pagilian iti Latin America.###
