BR LA UNION – Agtultuloy ti maisay-sayangkat a community pantry ditoy siyudad ti San Fernando, La Union a nangrugi idi Abril 14, 2026 para kadagiti naapektaran iti panagngato ti presyo dagiti produkto a petrolyo.
Daytoy a programa ket paset ti inisyatibo ti City Social Welfare and Development Office a tulungan dagiti naapektaran a sektor ditoy syudad ken makissayan ti rigat iti panagbiag.
Segun kenni Zhandra Louisa V. Manongdo ti City Public Information Office, awan iti target a bilang dagiti maikkan ngem umaboten kunana iti nasurok 1000 nga indibiduwal ti natulongan sipud nangrugi ti Community Pantry.
Malaksid iti linuktan da a Community Pantry, adda pay ti kapada nga aktidad idiay Brgy. Tanqui, Syudad ti San Fernando, La Union nga idaulwan ti City Disaster Risk Reduction and Management.
Innayon pay ni Manongdo a nupay addan ti panagroll back ti presyo dagiti petrolyo, itultuloy da latta ti community pantry, agingga nga adda iti maited kadagiti tattao.
Innayon na, nga uray inton agsubli ti stable a presyo ti langis wenno malpasen ti krisis, mangisayangkat da latta ti sabali a programa tapno naan-anay a maka-rekober dagiti nakaru a naapektaran.
