LA UNION – Addan iti pakabuklan a 2,427 repatriated OFWs a naggapo iti naduma-duma a nasyon, iti nakaawiden iti bukod da a lugar iti Ilocos Region babaen iti ‘Hatid Probinsiya” program ti gobyerno.
Idadaulwan daytoy ti Overseas Workers Welfare Administration (OWWA) kabinnulig da iti dadduma pay nga ahensiya ken lokal a gobyerno.
Base iti kauddian a datus manipud OWWA Region 1, kaadwan kadagiti napaawiden a pinoy workers abroad ket manipud Pangasinan nga umabot iti 1,377; La Union – 419; Ilocos Sur – 336; Ilocos Norte – 251; ken 44 nga OFWs manipud probinsiya ti Abra iti naasistiran ti OWWA Region 1.
Kabayatanna, manamnama nga iti sumaruno a bulan ti Hulyo ket maipalospos iti kanayunan a pondo ti Department of Labor and Employment (DOLE)-Region 1 para iti pannakaituloy ti maipapaay a tulong kadagiti OFWs a napukawan ti trabaho iti sabali a pagilian gapwanan ti covid-19 pandemic.
Iti tulong ti DOLE-AKAP program, umaboten iti 5,000 displaced OFWs iti rehiyon ti naikkan ti cash aid ken aganay P57-million iti nabusbos a pondo.
