Nasurok a 215,000 nga indibidual manipud kadagiti 538 a barangay idiay Ilocos Norte, Ilocos Sur, La Union, ken Pangasinan iti naapektaran ti nagtipon nga epekto ti Habagat ken agtultuloy a panagtudo ditoy Region 1.
Maibasar iti report ti Office of Civil Defense Region 1, dumanon ti 60,394 a pamilya wenno 215,074 nga indibidual ti apektado iti kalamidad.
Nailista met iti panaglayos kadagiti uppat a probinsia iti rehion, partikular iti Pangasinan nga ado dagiti nalayos a lugar gapu iti dakkel a volume ti danom ti tudo.
Kabayatanna, agtultuloy iti validation seknan dagiti dadduma pay nga insidente ken pagkasapulan dagiti apektado a komunidad.
Agtultuloy met iti pannakikoordinar dagiti disaster response offices kadagiti lokal a gobierno para iti napartak a panagsungbat, bayat a mabalbalakadan iti publiko nga agtalinaed nga alerto ken padaanan dagiti opisial a weather ken disaster advisory.
