Dumanon ti aganay 17,694 a tattao ti inlasin ti Department of Social Welfare and Development (DSWD) nga apektado ti nasaknap a panaglayus idiay Mimaropa, Western Visayas, Central Visayas, ken Zamboanga Peninsula (Region 9).
Maibasar iti datos manipud DSWD Disaster Response Management Office, daitoy ket katupag ti 5,022 a pamilya manipud ti pakabuklan a 142 nga barangay kadagiti uppat nadakamat a rehiyon.
Iti agdama ket nakalukat latta dagiti 80 nga evacuation centers a temporario a pagnanaedan dagiti 1,598 a pamilya a buklen ti 5,255 a tattao.
Kabayatanna, pinili met ti aganay 3K a pamilya a temporario a makinaed paylaeng kadagiti kakabagian ken gagayyem da kasaruno a madanon ti layus dagiti pagtaengan da. Kinuna ti DSWD a dumanon ti 22 a sangkabalayan ti totally damaged bayat a 152 met ti partially damaged.
Nakareserba met ti P3B a gatad ti supplies ken quick response fund nga usaren dagiti biktima ti nalawa a panaglayos.
