LA UNION – Pakabuklan a 507 a job seekers iti naikkan a dagus ti trabaho kabayatan ti naisayangkat a Kalayaan job and business fairs, nga intuyang ti Department of Labor and Employment-Regional Office I idi lunes, June 12, 2017.
Base iti waragawag ni Regional Director Nathaniel Lacambra ti DOLE Region One, ti nasao a bilang ket 18 percent manipud iti pakabuklan nga aplikante a nasurok 2, 747.
Base pay iti datus, nasurok a 28,000 a trabaho iti indiaya dagiti 125 local ken overseas employers iti intero a rehiyon uno kagiddan iti selebrasyon ti 119th Independence Day.
Kaadwan a trabaho a pinullatan dagiti aplikante ket iti benneg ti services sector, kas koma iti financial intermediation; transport, storage and communications; wholesale and retail trade, repair shops, personal and household goods; hotels and restaurants, ken social and personal service activities.
Maipalagip a nakibinnulig iti nasao nga aktidad ti labor department dagiti dadduma nga ahensiya ti gobyerno, kas iti POEA, OWWA, PRC, Pag-IBIG, SSS, Philhealth, NLRC. CSC, TESDA, DSWD babaen iti panangipaay da ti one-stop employment services.
