BR LA UNION – Nasurok 6,300 pulis ti maimuntar iti aglawlaw ti Senado inton bigat, Hulyo 6, 2026, a mangbantay ti seguridad kagiddan iti panagrugi ti impeachment trial ni Vice President Sara Duterte.
Segun kenni Philippine National Police-National Capital Region Police Office (PNP-NCRPO) spokesperson Police Major Hazel Asilo, kaadwan iti namnamaen a panagu-ummong ket iti sangwanan ti Senado.
Naamwan nga adda pay maysa a grupo nga agplanplano a mangisayangkat ti panag-martsa agturong idiay Senado manipud iti kaasideg a lugar, isunga manayunan pay dagiti maimuntar a kameng ti pulisya.
Nupay awan ti naaprubaran a permit para iti anyaman a rally agingga ita nga aldaw ti Domingo, imbaga ni Asilo a silulukat iti PNP-NCRPO kadagiti grupo a kayatna ti mangisayangkat ti protesta masurot laketdi iti umno a proseso.
Malaksid dayta, ipatungpal pay ti maximum tolerance iti pulisya ingkaso a padasen nga umasideg dagiti raliyista iti sangwanan ti Senado.
Maipagarop nga unaen iti dayalogo ken negosasyon babaen dagiti nadutukan a negotiation teams, bayat a naka-standby dagiti public order units nu kasapolan.
Saan pay a masinunuo ti pulisya nu manu ti manamnama a bilang dagiti makipaset iti tignay protesta, ngem siniguro da a nakasagana da a mangsungbat iti anyaman a sitwasyon nga adda pakainaiganna iti seguridad.
Maipalagip nga inimpeach ni VP Sara ti House of Representatives idi Mayo gappu iti alegasyon a culpable violation of the Constitution, graft and corruption, bribery, betrayal of public trust, ken dadduma pay a nadadagsen a krimen.
Idi Hunyo 1, nangidatag ti kampo ni Sara Duterte ti sungbat iti Articles of Impeachment ken kiniddaw da iti impeachment court nga ibasura iti kaso.
