LA UNION – Kagiddan iti napalukayan a community quarantine measures gaputi COVID 19 pandemic, adda manen ti timpuar a kaso ti African Swine Fever (ASF) ditoy La Union idi bulan ti Hunyo.
Kinumpirma iti Bombo Radyo La Union ni Provincial Veterinarian Dra. Nida Gapuz a pakabuklan a 825 a baboy ti naipasidong iti culling idi Hunyo partikular iti tallo nga ili ditoy probinsiya, a pakaibilangan idiay Sudipen, Agoo, ken Sto. Tomas.
Segun kenni Municipal Agriculturist Zeny Corpuz ti Sudipen, adda ti 575 a baboy, kaadwan ket burias, takong ken native ti naipasidong iti culling iti 4 a sitio idiay Brgy. Namaltogan ken maysa a sitio idiay Brgy. Old Central.
Pitupulo ket walo (78) hograisers manipud kadagiti nadakamat a lugar iti naapektaran.
Idiay ili ti Agoo, kinumpirma iti Bombo Radyo ni Municipal Agriculturist Victoria Cavinta a maysa a backyard idiay Brgy. San Miguel iti nagpositibo ti ASF ken 20 baboy iti naikali.
Iti agdama kunana, na-contain metten iti kaso ti ASF ken awanen ti nainayon pay a kaso ti ASF.
Kabayatanna, idiay ili ti Santo Tomas ket 250 a baboy ti naipasidong iti culling idi Hunyo, segun kenni Municipal Agriculturist Teresita Tagarino.
Kinuna ni Tagarino nga idi pay Mayo a nakailista da iti kaso ti ASF idiay Brgy. Patac, Ambitacay, Namboongan, Ubagan ken Lomboy.
Aganay 15 hograisers iti apektado sadiay.
