LA UNION – Umaboten iti P1,166,000.00 iti pakabuklan a danyos iti aquaculture ditoy probinsiya ti La Union iti las-ud laeng ti napalabas a dua a lawas, gapuanan iti nakaru nga epekto ti El Nino.
Daytoy ket base iti kauddian nga inruar a report ti Department of Agriculture (DA) Region one.
Naamwan ti Bombo Radyo La Union kenni Irene Tactac, planning officer ken head iti secretariat iti DRRMO ti DA-Region 1, iti nasao a danyos ket manipud laeng idiay ili ti Bacnotan ken Naguilian ditoy probinsiya.
Kinuna ni Tactac a partikular a naapektaran iti nakaru a kinabara ti temperatura ket dagiti lames a tilapia, malaga, bangus ken fresh water prawn a taraken manipud kadagiti popokan.
Kabayatanna, naka-monitor ita ti nasao a departmento idiay ili ti Aringay agsipudta addaan daytoy iti 5 a barangay a pakasarakan iti popokan.
Partikular idiay Barangay Sto. Rosario West, Sto Rosario East, Dulao, Sta. Lucia ken Barangay Samara.
Iti ili nga Aringay ket mabigbigbig a pagtataudan iti napintas a kalidad ti lames a bangus iti intero a probinsiya.
