Umaboten iti agarup 1,466 a hograisers nga apektado iti African Swine Fever (ASF) ti nabayadanen ti Department of Agriculture (DA) Regional Office-1 iti probinsya ti La Union babaen iti indemnification fund.
Aganay P44.4 million iti naipaiman ti DA kadagiti nadakamat a hograisers ken addaan dagitoy iti sigud a taraken a buklen ti 8,889 heads a baboy a naipasidong ti culling operation.
Iti pannakiuman ti Bombo Radyo La Union kenni DA Regional Office-1 Communication Officer Vida Cacal, kinunana a 781 laengen a hograisers iti probinsya ti saan a nabayadan iti P24,870,000.
Maururay laeng ti pannakai-release ti nasao a pondo babaen iti Department of Budget and Management sakbay a maipaima daytoy kadagiti saan pay a nakaawat hograisers nga apektado ti ASF.
Innayon pay ni Cacal, adda ti inrequest-da pay a kanayonan a pondo para kadagiti nabatbati nga apektado a hograiser ti Ilocos Region.
Agbalor ti P5,000 per head iti baboy ti bayadan ti DA.
Maipalagip a dumanonen ti 69 nga ili a sakupen ti Ilocos Region ti naapektaran ti ASF; ken manipud iti nadakamat a datos ket 14 nga ili iti La Union ti naapektaran ti nasao a sakit ti baboy.
Segun pay kenni Cacal, sumaysayaaten ti sitwasyon iti panagtarakenan iti baboy manipud iti epekto ti ASF kagiddan iti agtultuloy a recovery program ti DA para kadagiti naapektaran.
