Inbaba dagiti mannalon manipud iti Baguio City ken probinsia ti Benguet dagiti apitda iti nadumaduma a lugar a pakairamanan ti siudad ti San Fernando, La Union gapu iti sobra a suplay ti nateng ken nababa ti panagkasapulan iti merkado, a pakaigapuan ti dandani saan a mailako dagitoy.
Imbes a naan-anay a mapukaw dagiti apitda ken masayang, inkeddeng dagiti mannalon nga ilako da dagitoy iti nababbaba a presio tapno magunggonaan dagiti gumatang imbes a bay-anda a masayang wenno maibelleng.
Segun kenni Roselyn Mariano, isu ti nangidaulo iti pannakiuman kadagiti mannalon tapno mangibaba dagiti nateng manipud iti Benguet iti San Fernando City. Panggepda a matulongan dagiti mannalon uray la a makasubli ti gastosda iti produksion ken transportasion.
Kinunana dakkel a tulong metten nu adda maiyawid uray kakassano dagiti mannalon a paggatang ti gasolina ken agsirbu a puhunan para iti sumaruno a panagmumula.
Nupay nababa ti presio dagiti produktoda, kinuna ni Mariano nga agtaltalinaed a natibker dagiti mannalon ken ikagkagumaanda pay laeng ti bumangon iti laksid dagiti karit a sangsanguenda iti agrikultura ken panaglakoda kadagiti apitda.
Innayonna a daytoy ti maikadua a gundaway a naaramid daytoy tapno suportaran dagiti agmulmula iti nateng manipud Benguet ken tapno maikkan dagiti gumatang nga umili ti nalaka a nateng.
Maawis ti publiko, nangruna dagiti umili iti Siudad ti San Fernando ken kabangibang nga ili a suportaran dagiti lokal a mannalon babaen ti panaggatang kadagiti produktoda.
Masarakan ti nasao a puesto ti nateng ditoy Brgy. Madayegdeg, abay ti istasion ti Bombo Radyo La Union.
Karaman kadagiti nailako a produkto ken dagiti presioda:
Repolyo — ₱15 kada kilo
Umbok — ₱30 kada kilo
Patatas — ₱60 kada kilo
Kabayatanna, agtultuloy ti namnama dagiti mannalon a babaen ti suporta ti publiko, maksayan ti pannakalugi ken maituloy iti negosio iti laksid dagiti karit iti sektor ti agrikultura. (Report by
Bombo Ericka)
