Naan-anayen nga inserra ni Naga City Mayor Leni Robredo ti posibilidad nga agkandidato manen daytoy para iti nasional a puesto, pakairamanan ti kinapresidente wenno kinasenador iti 2028 elections.
Impaganetget ni Robredo ti desisionna iti press conference idiay Naga City ita a Lunes, Nobiembre 9, iti laksid ti panawagan ti sumagmamano a sigudna a kaalyado ken supporters a sumabak manen daytoy iti nasional a politika.
Segun iti mayor, nabayagen nga inkeddengna a saanen daytoy nga agsubli iti national government ken awanen ti makapagbaliw iti desisyonna.
Inlawlawagna pay a saanna nga ibilang ti panagtakemna kas mayor a kas panagsagana para iti 2028 elections. Uray nu saan nga agkandidato iti maikadua a termino, saan a kayat a sawen nga agsubli daytoy iti nasional a politika.
Inamin ni Robredo a makitkitana ti sumagmamano a limitasion iti abilidadna a mangtaming iti narikut a nasional a politika. Nupay kabaelanna nga aramiden dagiti trabaho ti gobierno nasional, kinunana a kasapulanna met ti umdas a political savvy tapno mataming ti nalawlawa a political matters.
Kabayatanna, silulukat met daytoy a mangsuporta kadagiti dadduma nga indibidual a pagarupenna nga addaan kabaelan a mangidaulo iti pagilian.
Nagserbi ni Robredo a bise presidente manipud tawen 2016 agingga 2022 ken nagtaray a presidente idi 2022 eleksion, ngem naabak kenni Presidente Ferdinand Marcos Jr.
Idi 2025, nagsubli daytoy iti lokal a politika ken nabutosan a kas mayor ti Naga City, nu sadino a kayatna nga ipamaysa ti atensionna kadagiti programa ken kasapulan dagiti umili.
