Mangisayangkat ti maysa a nationwide transport holiday inton bigat, Lunes, Marso 23, 2026, ti Alliance of Concerned Transport Organizations (ACTO) ken dagiti dadduma pay a transport groups kas protesta iti dakkel a panangngato ti presyo dagiti petroleum products.
Segun kenni Libay de Luna, presidente ti ACTO, daytoy nga addang ket sungbat iti agtultuloy a panagngato ti presyo ti gasolina ken diesel a mangparparigat kadagiti tsuper ken operator.
Maibasar iti kaudian a datos, ngimmato ti agingga ₱23.90 kada litro iti diesel ken ₱16.60 kada litro ti gasolina ita a lawas, gapu iti tensyon idiay Middle East a nakaapektar iti sangalubongan a suplay ti langis.
Gapu iti daytoy, manamnama a maapektaran iti biyahe dagiti jeepney, UV Express, ken modernized transport units idiay Metro Manila, Northern Mindanao, ken Iloilo City, no sadino nakasagana ti nasurok 50 transport cooperatives a makipamaysa iti tigil-pasada.
Malaksid iti protesta kontra iti panagngato ti presyo ti langis, impaganetget ti ACTO a saan nga umdas iti fuel subsidy ken dismayadoda iti pannakaitantan ti ₱2 fare hike a rumbeng koma a naipatungpal ita a bulan.
Kabayatanna, adalen ti administrasyon iti panangited ti bileg kenni Presidente Ferdinand Marcos Jr. a mangsuspinde iti excise tax iti petrolyo tapno mapababa iti epekto ti nangato a presyo ti langis.
Manamnama iti nakaro a pannakariribuk iti pampubliko a transportasyon inton bigat, nangruna iti rush hours, isu a mabalakadan dagiti commuters a mangitukon ti ad-ado nga oras iti biyahe ken mangsapul ti alternatibo a wagas ti transportasyon.###
