Immapela ti National Bureau of Investigation (NBI) kenni Senador Ronald “Bato” dela Rosa a sumuko a sitatalna mainaig iti arrest warrant ti International Criminal Court (ICC).
Daytoy ti sungbat ni NBI Director Atty. Melvin Matibag kalpasan nga imbaga ni Dela Rosa a saanna a suroten iti panawagan dagiti minority senator a sumuko.
Impaganetget ni Matibag a kas sigud a pannakabagi ti linteg, ammo ni Dela Rosa iti proseso ken sigudnan a pinaregta dagiti subjects ti warrant a sumuko a nasayaat.
Segun ti NBI Director, panggep daytoy a maliklikan iti riribuk wenno panangkamat ken sumango iti legal a responsibilidad iti linteg.
Impaganetget ni Matibag, ti warrant ket naggapu iti “competent court” a masapul a maraem.
Impakdaarna a no saan a sumuko iti senador ket posible a maaddaan ti kinnamat gapu ta mandato ti law enforcement nga ipatungpal iti linteg ken mapagtalinaed iti kinaurnos.
Malagip a napaay dagiti otoridad a nangiserbi iti warrant kenni Dela Rosa idi Lunes kalpasan a nagresulta ti kinnamat iti gandat a panangaresto, a nakaigapuan ti pannakaipasidongna iti protective custody ti Senado.###
