Nangiruar iti National Bureau of Investigation ti kabaruan a dash cam footage a mapapati a naglaun ti maudi a kanito ni sigud a Department of Public Works and Highways Undersecretary Maria Catalina Cabral.
Ti nasao a footage ket addaan ti marka a December 18, 2025 ken naala manipud alas-3:25 agingga alas-3:26 ti malem – iti aldaw no katno a natay iti sigud nga opisial.
Makita iti baro a footage iti maysa a babae a nakatugaw iti igid ti kalsada, iti nagbaetan dagiti concrete barrier a direkta a nakasango iti nauneg a rangkis.
Iti timestamp a 15:25:37 ti footage, makita iti nakatugaw a babae iti igid ti kalsada a mapapati a ni Cabral ken agpada ti suotna iti maudi a suot ti sigud nga opisial.
Immunan a nangiruar dagiti otoridad ti CCTV footage ti Ion Hotel a temporario a nagdagusan ni Cabral ken ti driverna iti kapada nga aldaw.
Iti nasao a video, makita a pimmanaw dagiti dua iti kuarto pasado alas-dos ti malem.
No sublianan iti immuna a salaysay ti driverna a ni Ricardo Muñoz Hernandez, agarup alas-dos agingga alas-tres ti malem idi imbatina iti sigud nga opisial idiay Kennon Road, Sitio Maramal, Camp 5, Barangay Camp 4, Tuba, Benguet.
Napasamak daytoy kalpasan a naggapu-da iti Ion Hotel idiay Baguio City.#
