Binilin ti National Disaster Risk Reduction and Management Council (NDRRMC) ken Office of Civil Defense (OCD) iti amin a member agencies ken regional/local Disaster Risk Reduction and Management Councils, nga ingato ti tukad ti kinasagana wenno alert status kasaruno ti panagserrek ti Super Typhoon Rosal iti Philippine Area of Responsibility (PAR).
Binilin pay ti konseho dagiti maseknan nga ahensiya ti gobyerno a siguradwen iti napaspas a deployment dagiti emergency supplies, ken i-preposition dagiti relief goods.
Naka-high alert met ti Department of Social Welfare and Development (DSWD) ken minilyon a family food packs (FFPs) ken non-food items iti agdama a nakadulin kadagiti strategic hubs ken warehouses iti intero a pagilian para iti dagus a distribusyon nu kasapolan.
Naka-standby metten dagiti heavy equipment para iti clearing operations, agraman dagiti medical, emergency, ken transport units manipud naduma-duma a puwersa kas ti Philippine Coast Guard (PCG).
Nupay saan a namnamaen nga agdisso iti daga iti mata ti Super Typhoon Rosal, mabalin a papigsaenna iti panagtudo ken mangigubway iti narungsot nga angin partikular iti ungto ti amianan a paset ti pagilian.
Iti agdama, nakaibayog ti Tropical Cyclone Wind Signal (TCWS) No. 1 kadagiti probinsya idiay Batanes, Cagayan, Babuyan Islands, Apayao, Kalinga, Isabela, Ilocos Norte, Aurora, ken Catanduanes.
Mabalakadan ti publiko nga agtultuloy a padaanan ken amwen iti opisyal a report ti DOST-PAGASA ken makitinnulong kadagiti lokal nga otoridad ingkaso a mangipatungpal ti pre-emptive evacuation.
