LA UNION – Arigna na a sumuknor iti tulang ti kalammiis ita idiay pagilian a China kalpasan a nagsuwek iti -1° C iti agdama a temperatura.
Gaputi dayta, nanayunan manen ti panagdandanag dagiti tattao sadiay karaman dagiti OFWs iti posible a panagadu dagiti makaptan ti respiratory illnesses, nangruna ita nga agraraira iti deadly virus nga N-COV.
Daytoy ti imbinglay iti Bombo International Correspondents nga isuda Jerrold Pascua ken Dina Columbano manipud Kaifeng, Henan.
Rimuar dagitoy iti nasapa manipud iti pagnanaedan da a dormitoryo tapno laeng maipakita iti agdama a paniempo ken sitwasyon iti nasao a lugar.
Segun kenni Pascua, agtaltalinaed a lockdown iti nasao a lugar ken awan pay ti panniguro nu kaatnu nga agsubli iti normal a sitwasyon sadiay.
Iti sobra a kinalammiis ken angep a mapaspasaran sadiay, mabalin ti agsurat iti simento, kas koma laengen iti insurat da Pascua ken Columbano a “GOD BLESS” ken “BOMBO RADIO.”
Iti kauddian a update, umaboten iti nasurok 560 dagiti natay iti coronavirus outbreak a nagtaud idiay Wuhan, China ken nasurok metten a 28,000 dagiti nakaptan ti virus iti dandani 25 a pagilian.
