Dumanon ti ₱188,868,123.40 iti naisapubliko a kinabaknang ni Senate President Vicente Sotto III iti Statement of Assets, Liabilities, and Net Worth (SALN).
Maibasar iti Certified True Copy ti SALN nga inruar ti opisina ni Senate Secretary Atty. Renato Bantug Jr. idi Hunyo 30, 2025, impadamag ni Sotto nga aggatad ti ₱335.17 million dagiti real state property na.
Karaman dagiti tallo a balay ken lote – nga iti kanginaan ket mapatta-patta nga aggatad ti ₱235 million — kasta met dagiti dua a condominium unit, dua a residential lot, ken maysa nga agricultural lot.
Dumaon ti ₱130.4 million dagiti personal a sanikuana, gapuanan tapno dumanon ti ₱465.6 million iti assets ni Sotto.
Addaan pay isuna ti utang nga aggatad ti ₱276.7 millon, karaman dagiti bank loans, personal loans, ken dadduma pay a babayadan.
Ngimmato ti ₱103.2 million iti kinabaknang ni Sotto iti napalabas a lima nga tawen – manipud ti ₱85.6 million iti 2020 aginggana iti agdama a gatad, bayat nga idi 2016 ket agarop ₱63.8 million iti kinabaknang na.
Iti kapada a dokumento, indeklara ti manmanday-linteg a walo dagiti kabagian na nga agserserbi iti gobierno ken sumagmamano kadakuada ket adda iti opisina.
Nalatak met ni Sotto kas regular host ti maysa a noon time show kalpasan a temporario a nagsardeng iti panagbalin na a senador.###
