LA UNION – Pinakawan ti Manna Mall Management a nakabase iti Barangay Pagdaraoan Biday Road, San Fernando City, La Union iti netizen a nangiwaras ti fake news seknan iti 50 nga empleyado a nagpositibo ti COVID 19.
Iti eksklusibo nga interview ti Bombo Radyo kenni Mall Administrator Rico Castañeda, pinakawan ti management iti nasao a netizen iti laksid a nadadael iti operasyon ti mall ken milyon ti napukaw a birok dagiti negosyante, iti uneg ti dua a lawas a panagrikos ti nasao a fake news.
Kabayatanna, iti met panagsarita ti netizen a nabigbig iti nagan a Marra Hesido, temporaryo nga agnanaed ti Barangay San Francisco ditoy syudad, nagpadispensar ken dimmawat ti pammakawan iti Manna Mall ken kadagiti amin a tattao a naapektaran iti inaramid na a panagi-post ti fake news iti social media, partikular iti bukod daytoy nga account.
