Nakalukat itan ti National Food Authority nga gumatang kadagiti nadalus ken namaga nga irik ditoy La Union.
Iti pannakiuman iti Bombo Radyo La Union kenni NFA La Union Provincial Manager Engr. Fortunato Bulao, kinunana nga agbalor iti P19.00 per kilo ti panaggatangda kadagiti irik manipud kadagiti indibiduwal a mannalon ken kooperatiba.
Mainaeg daytoy, iyal-allukoy iti NFA La Union kadagiti interesado a kooperatiba wenno indibidwal a mannalon nga agilako iti irik kadakuada no sadinno silulukat dagiti bodegada nga umawat kadagitoy.
Karaman kadagiti kasapola iti panagilako iti irik ket pakairamanan iti certification wenno endorsement manipud iti Municipal Agriculture Office para kadagiti indibidwal a mannalon ken masterlist kadagiti kooperatiba.
Masarakan dagitoy warehouse iti NFA idiay San Juan, La Union, Bangar, ken Agoo.
Innayon pay ni Bulao a sakbay nga agturong dagiti aglako ti irik ket kasapolan a maikoordinarda pay iti NFA tapno maipaayanda ti schedule kadagiti nadakamat a bodega.
