BR LA UNION – Nagpanawagan iti National Food Authority (NFA) kadagiti trader a saan a baraten dagiti mannalon iti panaggatang ti palay wenno saan pay a nagiling a bagas.
Segun kenni NFA Administrator Larry Lacson, adda dagiti lugar a gumatgatang ti palay iti kantidad nga P11.50 agingga P15 kada kilo, makuna a nababa unay nu ikumpara iti puonan dagiti mannalon nga umabot iti P12 agingga P14 kada kilo.
Maibasar iti naglabas a procurement ti NFA, naamwan a gumat-gatang daytoy ti clean and dry a palay iti presyo a P23 agingga P30, bayat a ti fresh ken wet a palay ket P17 agingga P23 kada kilo.
Inlawlawag ni Lacson ti makagapo iti panagsuwek ti presyo ket gapu iti pammutbuteng nga ar-aramiden ti sumagmamano a trader a napunno iti bodega ti NFA.
Innayonna pay a bimmaba ti presyo ti bagas iti sangalubongan a merkado, ken pas-pasarunwan met iti local millers.
Tapno matulungan dagiti mannalon, nangipaay ti espasyo iti NFA kadagiti bodega idiay San Ildefonso, Bulacan.
Paspasan da met iti mangipasdek ken mangtarimaan ti 134 a bodega tapno maingato ti kapasidad ti pagidulinan ti palay.
Immuna ti daytoy, gimmatang pay ti NFA ti 14 truck tapno direkta a makagatang da ti palay kadagiti lugar a nababa iti presyo, ken plano da pay nga agnayon ti 600 truck agingga iti tawen 2028.
Iti agdama, nakagatang ti NFA ti 4.6 milyon a sako ti bagas, mas nangatngato iti target a 3.6 milyon.
Tarigagay ti NFA a protektaran ti birok dagiti lokal a mannalo ken masiguro nga umdas ti buffer stock ti bagas ditoy pagilian.
