LA UNION – Pagan-annaden ti National Intelligence Coordinating Agency (NICA) dagiti kandidato kangrunaanna dagiti presidential candidates, iti maki-alyansa kadagiti grupo a pagarupenda a makatulong iti panangabak dagitoy iti May 9 elections.
Iti eksklusibo a pannakiuman ti Bombo Radyo La Union kenni NICA Regional Director Mildred Abordo ti Ilocos Region, kinunana a ti pannaki-alyansa iti CPP-NPA-NDF ket awan ti nasayaat a gubwayen na, gaputa sabali iti ranta dagitoy ken adda bukod da nga interes.
Impaganetgetna a kayat laeng dagitoy a grupo a mapapigsa ti puwersa da, makaala ti pondo, makaala ti puwesto wenno posisyon iti gobyerno, ken mawaya-wayaan dagiti political prisoners.
Sungbat daytoy ni Abordo seknan iti salodsod nga adda dagiti presidential aspirant iti nagkuna a nakasagana dagitoy a makidayalogo iti terorista a grupo.
Inaklon pay ni Abordo nga adda dagiti partylist group a konektado iti CPP-NPA-NDF, base met laengen kunana iti waragawag ti founding chairman dagitoy a ni Joma Sison.
Dagitoy ket iti Anakpawis, Kabataan Partylist, Bayan Muna, Act Teachers, ken Gabriela.
Iti Permit to Campaign (PTC) ken Permit to Win (PTW) ket saan a rumbeng nga aramiden dagiti kandidato gaputa segun kenni Abordo, maysa daytoy a klase ti extortion wenno panagkikil dagiti rebelde nga CPP-NPA-NDF.
