Namnamaenen ti liderato ti North Luzon Expressway Corporation (NLEX) iti panagdupudop dagiti lugan kadagiti toll ways a mangrugi inton Miyerkules, Abril 16 agingga inton Huwebes Santo, Abril 17.
Segun kenni NLEX Traffic Management Head Robin Ignacio, manamnama a dumanon ti agingga 385K ti kaado dagiti lugan a dumalyasat iti kangitingitan ti Semana Santa.
Nangatngato daitoy manipud ti 350K a promedio a bilang dagiti lugan a dumaldalyasat nga inaldaw.
Kabayatanna, tapno met matulongan a mapabang-ar dagiti kalsada, segun kenni Ignacio ket malukatan amin nga lanes 24/7 ken maiwaras pay dagiti traffic personnel kasta met a masuspindir paylaeng amin nga maar-aramid nga road repairs, malaksid laengen nu emergency a kasapulan talaga a palpasen.
Maipatungpal pay ti counterflow scheme kadagiti lugar nga addaan ti nadagsen a taray ti trapiko a kadawyan a maob-obserbaran manipud alas dos ti malem ti Miyerkules Santo wenno inton Abril 16.
Malukatan pay dagiti zipper lands iti northbound lane apaman a mangrugin nga agsubli dagiti motorista idiay National Capital Region kalpasan met iti Semana Santa.
